Afnám verðtryggingar?

Þeir eru margir um þessar mundir, sem hrópa sig hása yfir óréttlæti verðtryggingar og krefjast þess af mikilli eindrægni að fyrirbærið verði afnumið strax.

Ísland er vissulega eitt af fáum löndum, sem viðhefur þessa aðferð við ákvörðun kostnaðar við lántökur. Fyrir því eru sannfærandi ástæður. Ég ætla ekki að rekja þær hér að öðru leyti en að láta fylgja slóð á pistil, sem Víglundur Þorsteinsson skrifaði á AMX fréttavefinn sl. september.

Kíkið á greinina. Hún stendur fyrir sínu.

http://www.amx.is/pistlar/9837/

 

Vill verðtryggingu á lánin

Sovét Ísland?

Undirlægjuháttur og ræfildómur þeirra, sem enn geta fengið það af sér að halda áfram að styðja inngöngu Íslands í Evrópusambandið er með eindæmum og hafa náð nýjum hæðum.

Það liggur fyrir að ESB áskilur sér rétt til að ráðskast með atvinnuvegina, sem kemur bezt fram í nýjustu upplýsingum frá Berlín þar sem þýzka þingið krefst þess að látið verði af hvalveiðum áður en Brussel-veldið láti svo lítið að vefja okkur örmum. 

Ritstjóri Fréttablaðsins fær vart vatni haldið í leiðara 17. júní yfir því að „[a]llar líkur [séu] á því að leiðtogar aðildarríkja Evrópusambandsins samþykki á fundi sínum í dag að hefja aðildarviðræður við Ísland.“ 

Síðar í leiðaranum segir að „hún [ákvörðun herramannanna í Brussel] er til merkis um að Ísland njóti viðurkenningar sem sjálfstætt, evrópskt lýðræðisríki. Ísland er velkomið í hóp nærri þrjátíu annarra, sem taka sameignlegar ákvarðanir um mikilvæg mál en hafa hvorki fórnað sjálfstæði sínu né sérkennum.“

Þessi leiðari er dæmigerður fyrir dómgreindarskort aðildarsinna, sem ekki heyra, og ekki vilja heyra að verið er að ráðskast með sjálfstæði Íslendinga á ótrúlega óforskammaðan hátt.

Það skyldi þó ekki vera að Sovét Ísland, óskalandið, sem ákveðnir aðilar létu sig dreyma um fram eftir allri síðustu öld, sé loks að verða að veruleika?  Hafa þessir draumóramenn t.d. gleymt því að fyrir ekki löngu var þjóðinni stefnt til atkvæðagreiðslu um Icesave-málið? Er minna mark takandi á niðurstöðu þeirrar atkvæðagreiðslu en ákvörðunum vina þeirra í Brussel?

 

 

Eining ESB í Icesave-deilunni

Er nokkur hissa?

Tæp 92% fólks hefur enn vinnu, sem gera má ráð fyrir að greidd séu fyrir laun.

Bankakerfið er ónýtt og yfir því hvílir nagandi vantraust, sem ætti ekki að koma neinum á óvart miðað við frammistöðu fyrri ára. 

Það eru þessir sömu bankar, sem láta sér detta í hug að bjóða almenningi neikvæð raunvaxtakjör meðan innistæðurnar eru geymdar á þægilegum vöxtum í Seðlabankanum.

Enn eru það þessir sömu bankar, sem sýna lántakendum dæmalausa óbilgirni með timburmannakenndu vaxtaokri.

Enginn er til hlutabréfamarkaðurinn og mætti, þess vegna, leggja af verðbréfamarkað í landinu. 

Fólk sér lítinn akk í að „fjárfesta í steypu“. Húsnæðismarkaðurinn er ekki til sem slíkur og hefur færzt niður á skiptimarkaðsstig.

Er það nema von að fólk kaupi sér dýra hluti þegar engir virðast valkostirnir? 

Biðlisti eftir Rolex-úrum og góð sala sögð í flatskjám

Atvinnuleysisbætur skjaldborgarinnar

Nú þegar hillir undir missi atvinnuleysisbóta geta þeir, sem ekki hafa ekki hafa séð sér fært að sjá sér og sínum farborða með vinnu, horft til þess að þurfa að segja sig til sveitar, svo gæfulegt sem það nú er.

Forstjóri Vinnumálastofnunar segir „greiðslu bóta þannig færast yfir á sveitarfélög að miklu leyti á næstu misserum ef ekki tekur að birta til í efnahagsmálum þjóðarinnar.“

Fyrirvari forstjórans er heldur fátæklegur ef hann í raun býst við að bætur í efnahagsmálum þjóðarinnar séu þess eðlis að búast megi við jákvæðum fréttum í atvinnumálum.  

Þeir 13.875, sem voru atvinnulausir í maí, geta allt eins búizt við að verða það áfram um ókomna tíð og þurft að þiggja ölmusu úr sjóðum sveitarfélaga.

Ríkisstjórn alþýðunnar, hin norræna velferðarstjórn, hét að slegin yrði skjaldborg um heimilin og fólkið í landinu og atvinnuvegina. Það var gert fyrir löngu síðan, en enn er hlutfall atvinnulausra yfir 8% af vinnuafli. Gert er ráð fyrir að þessi hlutfallstala fari í, eða yfir, 10% með haustinu og í vetur. Fyrirtækin sjá sig neydd til að segja upp starfsmönnum vegna aðgerðaleysis stjórnvalda og ekkert er að gerast, sem gæti bent til að ljóstýru væri að sjá í myrkrinu. Þrefað er um keisarans skegg í aðgerðaleysi og aumingjaskap.

Segjum okkur bara til sveitar.

 

Brátt hverfa bæturnar

Hryðjuverkalög; liggur í augum uppi

Það hefur greinilega enginn bent þýzkum frammámönnum á þá einföldu staðreynd að eðlilegasta lausnin á vanda þýzkra flugfélaga er að fara að dæmi Breta frá því í október 2008.

Þar sem það er greinilegt að Íslendingar bera ábyrgð á hremmingum flugfélaganna er eina ráðið að fella landið undir hryðjuverkalög (þau hljóta að vera til í Þýzkalandi) og krefjast fullra bóta með vöxtum frá fyrsta degi gossins.

 

Vilja fá bætur vegna eldgossins

Stærsti sirkus heims?

Nú þegar trúðarnir komast til valda með dyggri aðstoð Dags B. verður fróðlegt að sjá hvernig grínið kemur til með að þróast.

Ekki þarf að búast við að menn leggi mikla áherzlu á að reka borgarsjóð án taps. Það er ekkert skemmtilegt og ekkert fyndið við það að fást við svoleiðis verkefni.

Ekki þarf heldur að gera ráð fyrir að reynt verði að atvinnumálum verði sýnd mikil athygli. Hundleiðinlegt verkefni, sem enginn skemmtir sér við að fást við og reyna að leysa.

Fasteignagjöld. Djók.

Útsvar. Djók.

Hvað ætla menn að gera? Ja, vit vitum það ekki, en það kemur í ljós.

Þannig má búast við að þetta nýja samkrull, sem orðið er til vegna alvarlegrar tilvistarkreppu Dags B. Eggertssonar og Samfylkingarinnar í Reykjavík, fyrir tilstuðlan trúðagrúppunnar, verði að fyrirferðarmestu grínsýningu í Evrópu, jafnvel heimi.

Ekki þarf að búast við að þetta standi í fjögur ár. Til þess yrði það ekki nógu fyndið, en slæmt verður þetta meðan það stendur.

Jón Gnarr verður borgarstjóri

Þægileg innivinna

Það er ekki auðvelt að átta sig á þessari þráhyggju, sem virðist þjaka starfsmenn banka þegar kemur að umræðum um laun.

Þegar öllu er á botninn hvolft, þá kemur í ljós að um er að ræða skrifstofumenn, sem sótzt hafa í að vinna hjá banka, enda því gjarnan haldið fram að um sé að ræða fremur þægilega innivinnu. 

Fyrir þessa innivinnu sína fá starfsmenn bankanna svo greidd þrettán mánaða laun á hverju tólf mánaða tímabili, en tárast nú af svekkelsi yfir því að enginn sé bónusinn.

Ekki verður á þessum vettvangi farið nánar út í launakjör bankamanna eins og þau kunna að vera í dag eða voru áður, a.m.k. ekki að svo komnu máli.

Hitt er annað mál, að ef greiða á bónusa, þá mætti gjarnan hafa sparifjáreigendur í huga, sem og aðra þá, sem treysta bönkum fyrir fjármunum sínum. Það eru fjármagnseigendurnir, sem eiga að njóta umframhagnaðar, ef einhver er, en ekki starfsmenn banka. 

Hugtakið eyðilagt með rugli

Viðskiptaráðherra: „...bagalegt...“

Í frétt á RÚV var vísað í viðskiptaráðherra vegna ofurgróða bankanna á kostnað ríkissjóðs, og þar með almenings, þar sem fram kom að bankarnir lægju með sparífé landsmanna á þokkalegum vöxtum hjá Seðlabankanum, takk fyrir, en svínuðu á sparifjáreigendum í skjóli vaxtamunar.

Ráðherrann lét hafa eftir sér að honum findist það „bagalegt að fé almennings [lægi] í Seðlabankanum í stað þess að smyrja hjól atvinnulífsins.“

Annar viðmælandi komst svo að orði að bankarnir væru með svo mikið fé að þeir hefðu ekki hugmynd um hvað þeir ættu við það að gera.

Staða heimilanna er slæm og staða atvinnuveganna er slæm. 

„Hætta er á að fjöldi heimila fari í gjaldþrot á næstunni.“

Fjöldi fyrirtækja leggur upp laupana í hverjum mánuði.

Það er að æra óstöðugan að minna á fyrirheit og loforð núverandi ríkisstjórnar, sem hét því í upphafi tilveru sinnar að slegin yrði skjaldborg um heimilin í landinu og atvinnuvegina.

 

Staða heimilanna afar slæm

Örvænting

Trúðarnir hafa farið þá leið að „ræða við“ Samfylkinguna.

Áf hálfu trúðagrúppunnar felast viðræðurnar í aulabröndurum og fíflagangi, sem líklega er rétt að fara að sætta sig við sem orðinn hlut. Þetta lið var kosið til fjögurra ára.

Það sem er þó verst er að þessar viðræður koma til með að fara gjörsamlega með Dag B. á taugum. Það var orðið nógu skelfilegt að sjá hann þeysast um og snúast í hringi á kosninganótt og daginn eftir, en það er haft eftir ólygnum að „viðræðurnar“ séu alveg að fara með hann. Við öðru er svo sem ekki að búast því vesalings Dag langar svo mikið að hann veit hvorki hvort hann er að koma eða fara.

Það er erfitt að hafa mátt þola stórtap fyrir sína hönd og Samfylkingarinnar, en ætla sér að vera samt tekinn alvarlega sem pólitískur máttarstólpi.

Besti og Samfylking ræða saman

Steingrímur er blendinn

Steingrímur J. Sigfússon talar um að „tilfinningar séu blendnar“ þegar hann tjáir sig um úrslit sveitarstjórnakosninganna sl. laugardag. Steingrímur kannast við að Vinstrigrænir hafa tapað manni hér og þar, t.d. í Reykjavík og Akureyri, en bætt við sig fulltrúum í öðrum sveitarfélögum, „auk þess sem staða hans sé víða sterk í sameiginlegum framboðum.“

Það er ekki nema von að fjármálaráðherrann þjáist af blendnum tilfinningum þegar litið er til fylgis flokks hans á landsvísu. Í kosningunum sl. laugardag tekst Vg að skrapa saman 9,6% af greiddum atkvæðum (minna en Framsóknarflokkurinn, sem náði 10,9%). Í sveitarstjórnarkosningunum 2006 náðu Vg 12,6% og í síðustu Alþingiskosningum 21,7%. Flokkurinn, sem setti sér norræna velferðarmunstrið að leiðarljósi fyrir rúmu ári síðan er á hraðri leið í gleymsku sögunnar. 

Hér höfum við flokk, sem setti sér það markmið að auka gagnsæi, en fær nú á baukinn frá frambjóðendum á sveitarstjórnarstiginu að „[v]ið þurfum að taka upp mál sem varða lýðræðisleg vinnubrögð og að þora að ræða um hlutina. Ég á með því við að við þurfum að búa til betri og meiri vettvang fyrir almenna félaga til að hafa áhrif á stefnu flokksins,“ segir Þorleifur sem telur forystu flokksins í litlum tengslum við alþýðu manna. Þar sé á ferð menntafólk í „glerhýsi“.

Tengslaleysi Vinstrigrænna, ekki aðeins við „almenna félaga“, heldur við almenning í landinu er með endemum og engin furða að flokksmennirnir séu svekktir. Allt frá því Steingrími lukkaðist að leggja undir sig stjórnarráðið í samkrulli við Samfylkinguna, hefur boðskapurinn einkennzt af feluleikjum, misvísunum og hreinum ósannindum. Er það nema von að kjósendur í landinu veiti þessu liði viðeigandi spark í afturendann? 

Lýðræðisleg vinnubrögð skortir í VG