Steingrímur J. - maður staðfestunnar?

Eitt sinn stóð ég í þeirri trú að Steingrímur J. Sigfússon, formaður Vinstri hreyfingarinnar, græns framboðs, væri maður trúr sannfæringu sinni, hver sem sú sannfæring kynni að vera.

Það var yfirlýst stefna vinstri grænna að ekki bæri að stefna á aðild að Evrópusambandinu. Þessu héldu forystumenn flokksins og frambjóðendur fram fyrir síðustu kosningar. Þetta virtist vera sannfæring Steingríms J. og félaga hans. Því var, í raun, lofað að ekki yrði gengið til samninga.

Þá kom að því að aðild bauðst að ríkisstjórn og hver fær staðizt slíkt gylliboð. Nú „hafa hlutirnir þróazt“. Þeir hafa þróazt svo harkalega að þessi yfirlýsti stuðningsmaður gegnsæis í opinberri stjórnsýslu beitir sér fyrir því að einn af hans eigin þingmönnum er beinlínis gerður brottrækur af Alþingi fyrir að hafa aðra skoðun á gangi mála en Steingrímur J.

Ég átti tal við einn fyrrverandi stuðningsmann vinstri grænna í dag. Hann gekk svo langt að beita joðinu, sem kemur á eftir Steingrími, á borð við fyrsta staf í nafni þess, er þáði 30 silfurpeninga fyrir næstum 2000 árum síðan.

Erfitt mál fyrir VG