Davíð hefur talað!

Á þessum vettvangi hef ég verið óhræddur við að tjá andúð mína á Icesave-samkomulaginu. Einkum og sér í lagi hef ég séð ástæðu til að tjá mig um arfaslaka frammistöðu samninganefndarinnar, sem var á ábyrgð þeirra Svavars Gestssonar og Indriða H. Þorlákssonar.

Þessi sjónarmið mín fá heldur betur byr undir báða vængi þegar lesin er grein Jóns Daníelssonar, prófessors við LSE í Morgunblaðinu 30. júní. Þar kemur fram að í raun hafi verið teflt fram undirmálsmönnum, samanborið við mjög öfluga og reynda samningamenn Breta og Hollendinga.

Og nú hefur minn gamli formaður látið í sér heyra. Hann fer ekkert í launkofa með sínar skoðanir á samkomulaginu fína. Það versta síðan Gamli Sáttmáli var gerður. Íslendingum beri, í raun, ekki skylda til að greiða einn eyri af þeim formúum, sem vinstri stjórnin vill láta okkur reiða af hendi og steypa okkur í óviðráðanlegar skuldir um ófyrirsjáanlega framtíð. Ég þarf ekki að færa rök fyrir sjónarmiðum Davíðs hér. Lesið Moggann.

Það er nú einhvern veginn þannig að ég tek meira mark á Davíð Oddssyni en Jóhönnu Sigurðardóttur, sem finnst greiðsla á umræddri „skuld“ við Breta og Hollendinga væntanlega vera sanngjarnt endurgjald fyrir aðgang að ESB. Ef við ekki borgum, komumst við ekki inn. Við verðum að fá þarna inni.

Ekki setja þjóðina á hausinn

Athugasemdir

[Þ.Jónsson, 4.7.2009 kl. 20:26]

Í 1.umræðu á þingi spurði Sigmundur Davíð Gunnlaugsson Steingrím J. hver kostnaðurinn við samningagerð Íslendinga hefði verið. Fjármálaráðherra svaraði því til að hann hefði hlaupið á tugum milljóna. Þá kom Sigmundur aftur í púltið og upplýsti að Pétur Blöndal hefði sagt honum að kostnaður Hollendinga hefði numið 1.3 milljarði við þeirra lögfræðiteymi, og við Íslendingar hefðu síðan greitt reikninginn úr tryggingainnistæðusjóðnum. Fjármálaráðherra svaraði því til að þetta væri misskilningur án þess að útskýra það nákvæmlega. En ef þetta á einhverja stoð í raunveruleikanum er augljóst að ekki var nægu kostað til að semja á skynsamlegum nótum. Eða láta reyna á lögfræðilega hluta um innistæðutryggingasjóð.

Já, Davíð hefur mikið til síns máls og ljóst að þetta er alls ekki búið.

kveðja ÞJ