Vinir okkar Bretar !!

Staksteinum Morgunblaðsins í dag lýkur á furðulegan hátt: „Þau [íslenzk stjórnvöld] eiga að fara fram á afsökunarbeiðni frá vinum okkar“(leturbreyting mín).

Fara á fram á afsökunarbeiðni frá Bretum vegna ummæla Gordons Brown í brezka þinginu þar sem hann gerði sig sekan um lygar og ómerkilegheit.

Sjálfsagt er ekkert við það að athuga að krefjast þess að beðizt sé afsökunar, en að tala um Breta í heild sinni sem „vini okkar“ er fáránlegt.

Bretar eru ekki, hafa ekki verið og munu ekki verða, vinir okkar. Íslendingar og Bretar háðu harðar rimmur um náttúruauðlindir í Þorskastríðunum. Þeim lauk á þann veg, sem allir vita, en það, sem allir vita greinilega ekki, er að ófarir Breta eru þeim vel geymdar, ekki gleymdar. Undanfarna áratugi hafa könnunarviðræður farið fram við Breta um gagnkvæma hagsmuni á Hatton Rockall-svæðinu. Afstaða Íslands hefur raunar verið sú að Íslendingar, Færeyingar, Írar og Bretar nái samkomulagi sín á milli um skiptingu landgrunns á svæðinu, en skili síðan sameiginlegri greinargerð til landgrunnsnefndar Sameinuðu Þjóðanna um ytri mörk landgrunnsins. Þessu hafa Bretar mætt með einhliða tilkalli til fullra yfirráða á efnahagslögsögunni á Hatton Rockall-svæðinu. Gert er ráð fyrir að olíu sé að finna á svæðinu og er því, líkt og í deilunum um fiskveiðar, um að ræða kröfur til auðlinda.

Icesave-deilurnar snúast um auðlind, peninga. Þær hafa verið í hörðum hnút og hafa Bretar, ásamt annarri „vinaþjóð“ okkar, Hollendingum sýnt fádæma þvergirðingshátt með yfirgangi og einhliða kröfugerð.

Við eigum í stöðugum deilum við aðrar þjóðir um hagsmuni. Í dæmi Breta (og Hollendinga) skulum við ekki láta okku detta í hug að kalla þá „vini“ okkar. Ég er með fjölda heita í handraðanum, sem eiga betur við.

 

Ekki í þágu íslenskra hagsmuna

Athugasemdir

[Loftur Altice Þorsteinsson, 10.5.2009 kl. 01:11]

Ég legg ekki í vana minn að lesa Staksteina, en við að sjá pistil þinn Gunnar leit ég á þennan texta. Þótt Íslendingar eigi marga góða vini í Bretlandi er ekki hægt að nefna Bretsku Samfylkinguna vini okkar og ég er sammála þér að í þessu sambandi er með ólíkindum að nota þetta orðalag.

Það er þó annað í Staksteinum sem mér finnst ennþá fáránlegra. Hér er ég með í huga sá misskilningur sumra hérlendis, að Bretsk stjórnvöld eigi ekki í viðræðum við AGS um deilur okkar við Breta. Það er öruggt að Bretar hafa að miklu leyti stjórnað allri aðkomu AGS að málum hérlendis. Bretar og Bandaríkjamenn hafa stjórnað AGS frá upphafi Bretton Woods samkomulagsins 1944.

[Gunnar Gunnarsson, 10.5.2009 kl. 01:32]

Það, sem þú segir, Loftur, um Bretton Woods, er því miður hárrétt. Þessar „vinaþjóðir“ hafa ráðið fjármálum og peningastefnu heimsins allt frá upphafi, 1944. Það er sannarlega dapurt að vera til eilífðar, að því er virðist. fórnarlamb þessarar sjálfskipuðu „fair-play“-þjóðar, Breta. Staðreyndin er bara sú, eins og ég rek í mjög stuttu máli í pistlinum, að við munum vera það um ókomna framtíð. Svo geta menn dútlað sér við að hugsa hvernig fara mun fyrir okkur innan ESB. Ég held við værum betur komnir sem 51. ríki BNA eða 11. fylki Canada.