Agnes og sannleikurinn

Þegar ég las skrif Agnesar Bragadóttur í Morgunblaðinu 14. apríl datt mér ekki annað í hug en að nú hefði konukindin endanlega sleppt sér í árásum sínum á Guðlaug Þór og Sjálfstæðisflokkinn. Postular siðferðis í fréttamennsku, ritstjórn dv.is, sjá meira að segja ástæðu til að fá fyrir hjartað í forundran yfir hamagangi frúarinnar og einn mætur fyrrverandi blaðamaður lét síðan þessi orð falla í athugasemd á Facebook: „Verð að vera sammála höfundi Sandkornsins... undarlegt nokk! Sem gamall blaðamaður varð ég dolfallin að lesa ,,fréttina" í morgun... skrýtin nálgun í fréttamennsku..." Er það nema von að fólk sé hissa.

 Í stuttu máli þá snýst þessi hamagangur um tveggja manna tal, sem frúin heimfærir á Guðlaug og Sigurjón Þ. Árnason, fyrrverandi bankastjóra Landsbankans. Inntak þessa tveggja manna tals telur frúin vera að Guðlaugur hafi verið í beinu sambandi við Sigurjón um hvernig bankinn ætti að fara að því að koma ákveðinni fjárhæð til Sjálfstæðisflokksins. Fyrir þessu öllu saman segist AB hafa traustar heimildir, „að sjálfsögðu svo traustar að um sannleiksgildi þeirra mundi enginn efast, yrðu þær gefnar upp".

Nú er það einhvern veginn svo að heimildir um tveggja manna tal geta aðeins verið tvær. Guðlaugur þvertekur fyrir að málum hafi verið hagað á þann hátt sem lýst hefur verið og í skrifum sínum spyr AB „Hvers vegna hefur Sigurjón Þ. Árnason ekki stigið fram og lýst því með hvaða hætti..." Ljóst er þá að ekki verður unnt að telja Sigurjón með heimildarmönnum.  Þar með eru báðar þær heimildir, sem hægt væri að taka mark á, horfnar. Eftir stendur frúin heimildalaus og þessi svokallaða „fréttaskýring", uppfull eins og hún er af tilbúningi og slúðri, er Morgunblaðinu til lítils sóma.

Ég skrifaði smá pistil um fjölmiðlarýni í gær og endaði hann á þessum orðum: „Þegar litið er til hins örlagaríka árs 2008 fer ekki á milli mála að þörf er á rækilegri úttekt á hlutverki fjölmiðla í umræðunni um efnahagshrunið. Ekki síður á það við um það sem liðið er af árinu í ár". Umfjöllun um skrif AB væru efni í langan kafla og hugarfar viðkomandi efni í heila bók, þó hvorugt komi þau efnahagshruni við.

Athugasemdir

[Loftur Altice Þorsteinsson, 15.4.2009 kl. 14:38]

Ég hef einnig verið furðu lostinn yfir þeim "upplýsingum" að símtal Sigurðar til Guðlaugs á sjúkrahúsið skuli vera til handagagns hjá Agnesi. Þetta var fyrir 2,5 árum ! Það er engu líkara en njósnað hafi verið um Guðlaug, dag og nótt.

Kom Agnes fyrst fram með upplýsingar um styrkinn frá FL Group ?

[Gunnar Gunnarsson, 15.4.2009 kl. 20:53]

Já, það er með hreinum ólíkindum hvernig AB stillir þessu dæmi upp í skrifum sínum. Greinin er einn spuni, sem fer víða, en endar hvergi. Þessum spuna eru gerð ágæt skil og hann greindur á dv.is (sjá hlekkinn að ofan).

Fyrstu upplýsingar um þessa styrki komu fram í kvöldfréttum Stöðvar 2, 7. apríl sl.