Heift og hamagangur

Einn ágætur vinstrimaður lét þessi orð falla í athugasemd á Facebook: „Meira að segja mér er farið að ofbjóða heiftin... finn eiginlega bara til með ykkur“.

Er það nema von að mönnum ofbjóði. Undanfarna daga hefur farið gandreið umræða, sem á sér engan líka og mig rekur ekki minni til að hafa séð. Talað hefur verið um leynifundi á Hótel Holti, fram eiga að hafa komið upplýsingar úr trúnaðarsamtali í grein í Morgunblaðinu, því eru gerðir skórnir að formaður Sjálfstæðisflokksins verði farinn eftir viku vegna einhverra meintra annarlegra tengsla við fyrrverandi forstjóra FL Group. Þannig mætti lengur telja.

Víst er að mistök hafa verið gerð; slæm mistök. Því skulu menn þó ekki líta fram hjá að maður hefur gengið undir manns hönd við að reyna að leiðrétta þessi mistök.

Ég reyni ekki að leyna því að mér, sem sjálfstæðismanni, hefur, eins og vinstri manninum, ofboðið heiftin sem birzt hefur í umræðunni; í raun er mér stórlega misboðið. Beini ég því til þeirra sem að mest hafa haft sig í frammi að þeir taki sér tak og láti af þessu veruleikafirrta masi. Það er þeim til lítils sóma og aðeins til ógagns fyrir Sjálfstæðisflokkinn.