Of harkaleg?

Það fæst ekki séð hvernig hægt er að túlka handtökuskipun á hendur Sigurði Einarssyni sem „of harkalega“. Maðurinn var boðaður í yfirheyrslu af til þess bærum aðila. Sigurður neitaði að verða við þeirri boðun, sennilega hræddur um að fyrir honum gæti farið eins og félögum hans, sem gert var að sæta gæzluvarðhaldi og/eða farbanni.

Hvorugur þessara kosta er þess eðlis að honum sé beitt nema rík þörf sé á; í þeim tilvikum, sem um ræðir, var því borið við að það væri í þágu rannsóknarhagsmuna.

Sé það meining Sigurðar Einarssonar að um sé að ræða eitthvað smámál, sem honum beri ekki að tjá sig um nema eftir eigin höfði og þegar honum sýnist, þá hefur veruleikafirringin náð nýjum og alvarlegum hæðum hjá þessum fyrrverandi formanni stjórnar Kaupþings.

Sigurður Einarsson og samstarfsmenn hans voru kallaðir fyrir vegna meintra brota af alvarlegustu gerð, sem fólust í því að setja íslenzkt þjóðfélag á hliðina. Að krefjast þess að Sigurður verði handtekinn og honum gert að svara spurningum, sem fyrir hann yrðu lagðar vegna meintrar aðildar hans að þátttöku í stærztu svikamyllu Íslandssögunnar getur engan veginn talizt óeðlilegt, hvað þá „harkalegt“.

Sigurður ætti að sjá sóma sinn í að láta af þessum málalengingum og taka því, sem að höndum ber. Það hafa margir, fjölmargir, farið verr út úr afleiðingum meintra brota hans og félaga hans. Það er kannski til of mikils ætlazt að viðkomandi sjái sóma sinn í einu eða neinu.

 

Handtökuskipun alltof harkaleg

Athugasemdir

[corvus corax, 18.5.2010 kl. 17:32]

Það er löngu kominn tími til að senda menn út að sækja Kaupþingsgöltinn og færa hann hingað hvort sem honum eða þessari lögmannsnefnu líkar það betur eða verr. Með rökstuddum grun er þessi siðblindi fáviti grunaður um stórglæpi gegn íslensku þjóðinni og það að hann setji sig sjálfur ofar lögum og rétti er bara í stíl við veruleikafirringu hans sjálfs. Sækjum manninn með valdi, það eru nógar ástæður og aðferðir til þess. Annað eins hefur nú verið gert!